बैल जोडी

शेतात नांगरती खिल्लारी जोडी

दुडक्या चालीनं चालती छान

ढवळ्या पिवळ्यांची बैल जोडी

नांगरणीच्या थाटाचा दिसे सन्मान!!

गुणवान माझी बैल जोडी

पिके उभे शिवार हिरवेगार

कडबा कुटार खाऊन पोटभर

आनंदात उचलती कष्टांचा भार !!

आज आला पोळा बैलांचा सण

न्हाऊ घाला,घाला रेशमी झुल

शिंगावर बेगड बांधुन औक्षण

करून लावा कपाळी टिळा,फुल!!

नैवेद्य वडा,पुरणाचा दावून

भरवा हातानं मायेच्या प्रेमाने

लेकरू ते आपले कर्तव्य दक्ष असे

राबराब राबतो इमानदारीने!!

वेशी मधून मिरवत येईल

रुबाबदार जोडी दिसते छान

दृष्ट काढून सांजवेळी बैलांची

अशी बैल जोडी माझी मौल्यवान!!

पोळ्याचा सण येता बळीराजा

साजरा करतो आनंदात अती

ऋण फेडतो जणू लेकरांचे,बघा

घंटानाद,मानपान करुन किती!!

नागपूर

9923819752