गाव…

गाव

शांतता गावातली होते हमेशा भंग आता…
राहिला ना फारसा गावात माझ्या ढंग आता…

लागली आबालवृद्धांना नशेची सवय येथे ,
नेहमी व्यसनात असते गाव माझे दंग आता…

फडकणारे सांगती झेंडे घरांच्या धर्म जाती ,
घेतले आपापले वाटून आम्ही रंग आता…

चालतांना बोलतांना ,तू नको गाफील राहू ,
नेम नाही गाव हे होईल केव्हा तंग आता…

प्रश्न ‘आ’वासून गावाला गिळाया लागलेले ,
गावही दररोज लढते जिंदगीची जंग आता…

-संदीप वाकोडे