महिलेची छेड काढणार्या व्यक्तीची गाढवावरून धिंड
बरेली : मंगळवारी संध्याकाळी साडेसातची वेळ. काही तरुणांचे टोळके एका व्यक्तीच्या घरात घुसले. त्या व्यक्तीला घराबाहेर फरफटत आणले. तोंडाला काळे फासून गाढवावरून धिंड काढली. उत्तर प्रदेशातील बदायूंमधील बिसौलीतील या घटनेचा व्हिडिओ सोशल मीडियावर व्हायरल झाला आहे. या व्यक्तीने महिलेची छेड काढल्याचा आरोप करत त्याला मारहाण केल्याचे सांगितले जात आहे.
हा व्हिडिओ सोशल मीडियावर व्हायरल होताच, पोलिसांनी त्याची गंभीर दखल घेतली. व्हिडिओत मारहाण करताना दिसून आलेल्या दोघांना पोलिसांनी अटक केली आहे, अशी माहिती वरिष्ठ पोलिस अधीक्षकांनी दिली. महिलेची छेड काढल्याचे त्यांनी सांगितले. मात्र, कोणत्याही महिलेकडून अशाप्रकारची तक्रार आमच्याकडे आली नाही, असेही पोलिसांनी सांगितले. एका ५६ वर्षीय व्यक्तीची गाढवावरून धिंड काढल्याचे व्हिडिओत दिसत आहे. त्या व्यक्तीच्या तोंडाला काळे फासलेले दिसते. तसेच त्याचे हात बांधलेले होते. या प्रकारानंतर या व्यक्तीच्या मुलाने बिसौली पोलिस ठाण्यात तक्रार दाखल केली. विपीन, सुरेश, विजेंद्र, मदननलाल आणि इतर काही जण, ज्यांची नावे मला माहिती नाहीत, असे काही जण २९ डिसेंबरला रात्री घरात घुसले. माझ्या वडिलांना त्यांनी घराबाहेर फरफटत नेले. त्यांना मारहाण केली. शिवीगाळ करून त्यांना जीवे मारण्याची धमकी दिली, असे त्याने तक्रारीत म्हटले आहे. या तक्रारीनंतर पोलिसांनी गुन्हा दाखल केला आहे. चौघांपैकी विजेंद्र आणि मदनलाल या दोघांना अटक केली आहे. महिलेची छेड काढल्याचा आरोप त्या मुलाने खोडून काढला आहे. माझ्या वडिलांचे केवळ महिलेसोबत भांडण झाले होते. शेतकर्याच्या शेतात आमच्या बकर्या घुसल्या होत्या. यावरून शेतकर्याच्या पत्नीसोबत किरकोळ भांडण झाले होते. त्यानंतर त्यांच्यावर अशा प्रकारचा हल्ला झाला आहे. गावासमोर अपमान झाल्याने माझे वडील अद्याप घरी परतले नाहीत, असे त्या मुलाने पोलिसांना सांगितले. पोलिस त्यांचा शोध घेत आहेत. व्हिडिओत मारहाण करताना दिसणार्या आरोपींपैकी दोघांना अटक केली आहे. गावात शांतता ठेवण्याचे आवाहन ग्रामस्थांना करण्यात आले आहे, अशी माहितीही पोलिसांनी दिली.
Related Stories
September 5, 2024
September 5, 2024
September 4, 2024