मुंबई : राज्यातील जनतेचे लक्ष लागून असलेल्या १४ हजार गावांमध्ये राजकीय धुरळा उडणार आहे. राज्यातील ग्रामपंचायत निवडणुकीचा प्रचार बुधवारी थांबला. शुक्रवार, १५ जानेवारीला ग्रामपंचायत निवडणुकीसाठी मतदान होणार आहे. तर १८ जानेवारीला मतमोजणी पार पडणार आहे. या निवडणुकीसाठी प्रशासन देखील सज्ज झाले आहे. मतदान प्रक्रियेसाठी गुरुवारी दुपारी प्रत्येक तहसील कार्यालयाच्या वतीने मतदान केंद्रांवर ईव्हीएम मशिन्स तसेच मतदान प्रक्रियेसाठी आवश्यक असलेली सामग्री रवाना करण्यात आली. ग्रामपंचायत निवडणुकीसाठी लाखो कर्मचार्यांची नियुक्ती करण्यात आली आहे. या कर्मचार्यांमध्ये महसूल प्रशासनासह शिक्षकांचा समावेश आहे.
राज्यात ३४ जिल्ह्यातील १४,२३४ ग्रामपंचायतींसाठी निवडणूक पार पडणार आहे. यातील काही गावांच्या निवडणुका बिनविरोध झाल्या आहेत. एप्रिल ते जून २0२0 या कालावधीत मुदत संपलेल्या १ हजार ५६६ ग्रामपंचायतींच्या सार्वत्रिक निवडणुकांसाठी ३१ मार्च २0२0 रोजी मतदान होणार होते. परंतु, कोविड-१९ ची परिस्थिती उद्भवल्याने १७ मार्च २0२0 रोजी हा निवडणूक कार्यक्रम स्थगित करण्यात आला होता. त्यानंतर तो पूर्णपणे रद्द करण्यात आला होता. यासह डिसेंबर २0२0 अखेर मुदत संपणार्या व नव्याने स्थापित होणार्या सर्व ग्रामपंचायतींसाठी ही निवडणूक घेण्यात येत आहे.
- अशा असणार वेळा
आता मतदान १५ जानेवारी २0२१ रोजी सकाळी ७.३0 ते सायंकाळी ५.३0 या वेळेत होईल. तर मतमोजणी १८ जानेवारी २0२१ रोजी होईल. गडचिरोली जिल्हा आणि गोंदिया जिल्ह्यातील चार तालुके वगळता सर्व ठिकाणी सकाळी ७.३0 ते सायंकाळी ५.३0 या वेळेत मतदान होईल. गडचिरोली आणि गोंदियातील चार तालुक्यांमध्ये दुपारी ३.00 पर्यंत मतदानाची वेळ असेल.
- कोरोनाबाधित रुग्णांना मतदानाची विशेष सुविधा
कोरोनाबाधित आणि विलगीकरण कक्षातील व्यक्ती; तसेच दोनदा तपासणीनंतरही शरीराचे तापमान विहित निकषांपेक्षा जास्त असलेल्या मतदारांना मतदानाची वेळ संपण्याच्या अधार्तास आधी प्रतिबंधात्मक उपायांचे काटेकोर पालन करून मतदान करता येईल, अशी माहिती राज्य निवडणूक आयुक्त यू. पी. एस. मदान यांनी दिली होती.