- गौरव प्रकाशन वृत्तसंकलन
अमरावती (प्रतिनिधी) : सुशिक्षित युवक-युवतींना रोजगाराच्या संधी उपलब्ध व्हाव्या व युवकांमध्ये आर्थिक सक्षमता निर्माण व्हावी यासाठी कौशल्य विकास, रोजगार व उद्योजकता, विभागीय आयुक्त कार्यालय, व आजीवन अध्ययन व विस्तार विभाग, संत गाडगे बाबा अमरावती विद्यापीठ, यांच्यावतीने दि. 9 जुलै 2022 रोजी ऑफलाईन पद्धतीने विभागीय पंडित दीनदयाळ उपाध्याय रोजगार मेळाव्याचे आयोजन करण्यात आले आहे. हा मेळावा विद्यापीठ परिसरात असलेल्या डॉ. के. जी. देशमुख सभागृहात सकाळी दहा वाजता सुरु होणार असुन विभागातील अमरावती, अकोला, बुलडाणा, यवतमाळ, वाशिम जिल्ह्यातील उमेदवारांना विविध क्षेत्रात निर्माण होत असलेल्या रोजगाराच्या संधी या मेळाव्याच्या माध्यमातुन उपलब्ध करुन देण्यात येणार आहे.
या रोजगार मेळाव्यात महिंद्रा ॲण्ड महिंद्रा लि., नवभारत फर्टिलायझर नागपूर, बडवे इंजिनिअर्स, मा. ज्योतिबा फुले मागासवर्गीय बहुद्देशिय संस्था, टॉलेंसेतु सर्व्हिस प्रा. लि., बजाज इलेक्ट्रीकल्स, मेगाफिड, बंनस्वरा स्निटेक्स लि., अलोक इंडक्ट्री लि. टेक्नोक्राफ्ट फॅशन लि., लाईफ इंश्युरंन्स व टिम प्लस एच. आर. या दहा कंपन्यांमधील रिक्त असलेल्या विविध पदांसाठी पात्र उमेदवारांची निवड या रोजगार मेळाव्यात करण्यात येणार आहे. मेळाव्यात सहभागी होणाऱ्या पात्र उमेदवारांनी सेवायोजन कार्ड, निवडणूक ओळखपत्र/आधारकार्ड, शैक्षणिक प्रमाणपत्रांच्या प्रती व लेखी परिक्षेच्या दृष्टीने आवश्यक साहित्य सोबत आणावे असे कौशल्य विकास, रोजगार व उद्योजकता, मार्गदर्शन अधिकारी प.भ. जाधव यांनी कळविले आहे.